طبت أوقاتكم
يا صاحبي والله يمسيك بالخير=واللي بقلبي عنك ماني مخبي
أنته بكلك فقت كل المشاهير=في عيني أجمل حي شرقي وغربي
ما عندي أجمل منك نجل المناعير=يا منيتي يا شوق روحي وحبي
أرسلت لك مني رموز وتعابير=باللي مكدر خاطري والك تنبي
قلبي تلاعب به هجوس وتفاكير=والذنب ذنب الشوق ماهو بذنبي
هواك كنه في ضلوعي مناشير=والقلب من زود الغرام متعبي
لا من ذكرتك صاب قلبي سواعير=كن الحمايم جوف قلبي تكبي
لولا ضلوعي خافقي سابق الطير=يبا لقربك يا بعد نبض قلبي
ماهو محسب للبعد والمشاوير=شفه و وده تقضي العمر قربي
لأجلك يدوس الجمر فوق المجامير=حوفه على صدق الغرام متربي
أسكنك جوفه عن هبوب المعاصير=يوم الهوى والشوق طيشه لعبي
واليوم أون وحالتي تجرح الغير=كن الحشا جوفه لهايب تشبي
أشقيت من شأنك هجوسٍ(ن)مداوير=وأنته بعيد وطيف ذكراك جنبي
ودي تجدد سابقات المخابير=اللي لها كم عام في علم ربي
يمكن تطيب جروح فيني مغاوير=يا سبة جروحي ويا كل طبي
لو عدتني أعطيت جزل التباشير=يا أغلى بشر مأخذ لقلبي ولبي
لأجلك ومن شأنك جميع المحاذير=أدوسها لرضاك طوعٍ(ن)وغصبي
لأجلك ومن شأنك نظمت المجارير=اللي مثل رايح سحابه يصبي
تسقي عروق الوجد بعد المعاذير=اللي هبوبه منك يمي تهبي
القى بها تخدير من غير تخدير=لين الغضي باللي طلبته يلبي
يمكن تزيد القلب والعقل تصبير=تسكن بها روحي ويشتد صلبي
وإلا بقضي باقي العمر تكدير=والله على بعض المقادير حسبي
لا صار مالي مقدرة بالمقادير=غصبٍ(ن)عليًه ما تمنيت اكبي
سود الليالي كنها نافخ الكير=من جالسه يصبر على كل غلبي
وبيض الليالي كنها نسمة عصير=تمر مر اكرام والحظ حربي
والخاتمة كانت حلومي شخاتير=واليوم شحت ما تكفي لشربي
ما كانت أحلامي حلوم العصافير=ولا كانت أمالي رمل في مهبي
كانت كبار وكنها شامخ النير=وأمست سواة العهن في وضع صعبي
لكن على ربي جميع التدابير=قادر يزينها على ما نحبي
يا صاحبي والله يصبحك بالخير=واللي بقلبي عنك ماني مخبي
التميز
الإهداءات
الهوى والشوق طيشه لعب بي !!!
رد: الهوى والشوق طيشه لعب بي !!!
