بسم الله الرحمن الرحيم
السلام عليكم و رحمة الله و بركاته
صباح / مساء
الخير
متواضعة آمل أن ترتقي لـ ذائقتكم الشعرية ..
العمر ساعة و الليالي تجاريب=ركضت قدم ما بين ميلٍ و عدلي
يدري بها اللي مكتسي راسه الشيب=يوم الليالي تجدل الهم جدلي
و أنا من الدنيا لقيت التعاجيب=أيامها طول العمر تجتهد لي
يومٍ معي يشرق مع الشمس و يغيب=و يومٍ رحل عني و يومٍ قعد لي
ثلاثة أيام شكى همها الذيب=صارعتها و الصبر ما ينجحد لي
و سجيت معها بالقدم ما اعلم الغيب=و لا أدري عن اللي عندها ينوجد لي
ظنيت فيها صافيه بالمشاريب=و قلت الفرح في قربها و السعد لي
لا شك أثرها تخلف الظن و يخيب=و الظن فيها ما زرع لي حصد لي
و رجعت منها بالجروح المعاطيب=و صمدت للوقت الشديد و صمد لي
أنادي الماضي و لا جالي امجيب=يا وقتي اللي رحت و اقفيت عد لي
هذا زمانٍ عذب الحال تعذيب=يفتل لي احبال الشقا و يعقد لي
فيه الأوادم بين غلطان و مصيب=كلٍ بدلوه تالي الوقت يدلي
و اللي عرفته من قرابه و اصاحيب=أحدٍ فهم شكواي و أحدٍ حقد لي
و أنا تراني ما تركت المواجيب=قبل يجي فالناس من ينتقد لي
اتعب ورى النوماس و أبعد عن العيب= و أجنب دروبٍ تجيب النقد لي
بعدي عن المنقود عز و مكاسيب=ما همني ضحكة حسودٍ حسد لي
أما شهد لي واحدٍ من هل الطيب =و ألا الردي ما همني لو شهد لي
و سلامتكم ،،
التميز
الإهداءات
تجاريب ،،
