كالعادة الأبيات بدون مقدمات
علها تروق لكم
بالهون يا سيد الخراعيب بالهون=ارفق بقلبي لا تزود عذابه
لا عاد تنشدني عن الحال وشلون=الحال من بعدك تعاوى ذيابه
كلي على ما قيل من دون في دون=العمر ينقص والليالي رتابه
اضحك واجامل والمخاليق يدرون=إن المشاعر تختلف لو تشابه
وانا بقلبي جرح فرقاك مدفون=يا مبتليني بالهوى والصبابه
كرهت من بعدك لغالي ومزيون=ومليت من نظم الشعر والكتابه
صار القصيد العذب كماي محزون=تشابهت أحوالنا لا غرابه
عقبت في عقلي وساويس وجنون=وعقبت في شعري خمول وكابه
أصحى وأنا مغبون وأنام مغبون=لا من ذكرت أيام راحت نهابه
راحت علي بلاش يا مسهر النون=ذئب القهر يشلع بقلبي بنابه
أذكر زمان الوصل شاكر وممنون=وأبكي لحالي مقفياتٍ(ن)ركابه
عايش على ذكراك شاعر ومفتون=نهبت عقلي بالحسن والذرابه
أسامر أطيافك للأطياف مرهون=علي من ماض الليالي رقابه
أون وأشعاري لوني يونون=ون الصويب اللي طعن بالحرابه
أبيك وظروف الزمن عنك يحدون=عرفت ليش الحال زايد خرابه
لكن يدبر حالنا خالق الكون=ما صك من دون المخاليق بابه
بالهون يا سيد الخراعيب بالهون=ارفق بقلبي لا تزود عذابه
التميز
الإهداءات
الحال من بعدك تعاوى ذيابه !!!
رد: الحال من بعدك تعاوى ذيابه !!!
