السلام عليكم ورحمة الله وبركاته
مساكم ...صبحكم الله بكل خير
واليكم الأبيات بدون مقدمات
على قد الغلا نعطي وناخذ من حبايبنا=نمد لهم بدون حساب وناخذ منهم بحساب
بطيب نمد ما نملك وتفداكم قرايبنا=على شأن الوفا والطيب ترخص للعيون رقاب
وهذي من قديم الوقت وحده من عجايبنا=وراع الطيب والمعروف لا ينذم ولا ينعاب
على شأن الكرم والجود نشعب في ركايبنا=نشرقها نغربها ونكمل موجب الأطلاب
طبيعة من قديم الوقت لا مرت كتايبنا=يدانا بالكثير تجود راع الوافيه كساب
نصب الكيف نكرم ضيف ونحشم نسايبنا=نعز الجار والخوة ولو إنه من الأجناب
نسج الخيل صبح وليل لا قامت حرايبنا=نصك الخصم فوق الخشم بالميقاف مابنهاب
نوسع جرح ونبري جرح وهذي من طبايبنا=نداوي كبود ندمي كبود مهما كانت الأسباب
نطفي نار نشعل نار لا هبت هبايبنا=صقور(ن)من فرايسها تحني بدمها المخلاب
نسقي دار ونغرق دار لا زمت سحايبنا=تهد جبال كالزلزال عامر يجعله خراب
على منهج الجدان و وصاة شايبنا=نعز اللي يدور عز بسيوف(ن)رهاف حداب
على وجه الثرا حنا ونجم سهيل هايبنا=ليا منا صحينا الصبح من مبداه عانه غاب
توكلنا على المولى وما هو راد صايبنا=ليا منا تناخينا نقصر طايلات أشناب
نهايتها ترا المقصود بحاضرنا وغايبنا=شيوخ المملكة ورجالها لكبد العدو مشهاب
نحاسب من يحاسبنا نطايب من يطايبنا=على نهج الكتاب ومن تتبع منهجه ما خاب
نوفي للعهود وصونها ماهو معيبنا=وهذي سنة أهل العهد والمعقول والألباب