السلام عليكم ورحمة الله وبركاته
اليكم الأبيات بدون مقدمات
لا تصدقون عاد ...والا بتروحون تدورون مثل اللي لقيته
ترا بتتعبون بس وما بتلقونه
قابلت بالصدفة مع السوق محتر=لي نية(ن)واله ثمانين نيه
قالت:وجع كنك بدربي مسمر=روح بنحيه خليني في نحيه
قلت:العفو يا نادر الزين مقدر=لو تعرفين بعلة جات فيه
صفة رمشك كنها صف عسكر=وجب علي أدق لك التحيه
قالت:وكاد إنك عليه تغشمر=والا تسوي للحريم الأذيه
أنا رموشي دائمة ما تغير=مافيه شيء(ن)زايد(ن)في عينيه
قلت:إسمحي لي عاد بشرح لك أكثر=هذا تواضع منك ميه بميه
قالت:ما فيني زود لأجل أتكبر=هذيي وصوف لكل منهي بنيه
أحيان ليا مني مشيت أتمخطر=كذا يقولن العرب نرجسيه
وأحيان أحب أكيد ناس مغرر=والا أنا من فعلهم ما عليه
وأحيان أخلي عاشق البيض يفتر=ما كنه الا لعبة(ن)في يديه
أحيان أحب اللبس مره محزقر=يضفي علي نفسي بعض جاذبيه
قلت:اسكتي والدرب قدمك ميسر=ماني بلك وأنتي بعد منت ليه
روحي عسى رب المخاليق يستر=أنتي طلعتي من البلاوي بليه
ما عاد بسمع شيء والقلب عذر=ماني زبون الخايسه والرديه
قالت:يا شينك ما تحب التطور=ما كنك الا في زمن جاهليه
الا بعد بقول لك شيء(ن)أخطر=صار الولد والبنت تمشي سويه
ولى زمن ليلى وعبله وعنتر=هذا زمن عجرم وهو صار هيه
الشعر يا حلوه مميش مسشور=واللبس بنطال (ن)كما جلد حيه
ما عاد تعرف أنثوي من مذكر=صرنا سوا ما عاد به عنصريه
ياشين عقلك باقي(ن)ما تحرر=طبع البدو ما يتفق لحضريه
لكن دامك من كلامي تكدر=دور بدالي من البنات بدويه
قلت:البداوة عز والله أكبر=كلك غلط الا بكلمتك ذيه
ما عاد به داعي أشاور وفكر=روحي عسى الله لا يردك عليه
دامك مسز تلقين بالسوق مستر=أنا بدوي معروف بالعنجهيه
الله خلقنا قوم للكر والفر=ونفوسنا دايم بفضله غنيه
الحر ما يغدي كلامه مكسر=والشامخة ماهي سواة الهميه
أنا قبلت يكون عقلي محجر=أخير لي من تبع نفس شقيه