السلام عليكم ورحمة الله وبركاته
الأبيات تعبر عن ذاتها
الشاعر اللي غمس جوف الدسم كوعه=خائف من الجوع نفسه يوم يشرقها
وليا تنوش صحون فوق مرفوعه=ما كل حاجة تنوشها بيلحقها
اليد يمكن تعود عاد مقطوعه=من مفصل الكف بالشلفا نعلقها
بعض السلع يافتى بالسوق ممنوعه=مثل السحائب صعيب تنوش بارقها
بعض العرب ما يميز كوعه وبوعه=ما يعرف اليد معصمها و مرفقها
ليا كان ودك تدور زول شعشوعه=سافر بلاد الغجر وإشعل حرايقها
دور ديار بها الشيمات منزوعه=أهل الشيم والمروة لا تصافقها
تلقا بها ما تبا سايع وسعسوعه=الطيبة منت شايف لو مفرقها
بعض المطالب ترا ماهي بمشروعه=ما كل الأبواب تفتح لأجل طارقها
ولا كل من صار تاجر نجح مشروعه=خص(ن)ليا كان ملفوفة طرايقها
حتى ولو شاف نفسه صار بالوعه=يطيح في قوم صلفات مطارقها
من لا تخير لزرعة وأحسن زرعه=الزرعة اللي زرعها بليس ماحقها
اللقمة اللي بجوف السم منقوعه=من ذاقها مات وهدومه يمزقها
الغصن لا مات معه ماتت فروعه=حقيقة والعرب تعرف حقايقها
ما كل رجل يهد الجدر فاروعه=واللي يشيل الحمل يقدر وسايقها
كل يشوف العيون بنظرة طبوعه=اليومه الناس صعب تعرف بايقها
جزيتي في هديه جات مطبوعه=واللي طبخ لحمته عاد يتمرقها
عشاه يلقاه عنده داخل متوعه=لا ينطح القوم ويعارض بيارقها
قيمته من حر ماله جات مدفوعه=وإن كان ما روقت نفسه نروقها