كل عام وانتم بخير
العيد شرّف والحبايب بعيدين=وقلبي يتوق متايق الطير قرناس
للي لهم في وسط قلبي ميادين=واللي غلاهم ماله اليوم مقياس
لاشك أبفرح فرحة العيد عيدين=عيدي وعيدك يابعد كل هالناس
الناس تفرح لابسه ثوبها الزين=وأنا في شوفك أتردد بالأنفاس
أكنّها بالصدر من بين لا بين=وأقولها بالصوت وأدق الأجراس
ماغيرك اللي تارسه محجر العين=وماغيرك اللي يزهي الزين بلباس
أنتي الوحيده من تقود المزايين=وأنتي الفريده والحلا فيك مغراس
وأنتي لا هنتي هالليالي وبعدين= مضرب مثل للناس من فوق الاقياس
يا بنت شيخٍ قايدٍ للسلاطين=معرّبه من جدّها لآخر الساس
يا عقد لولو .. يا خلاصة مراجين=ياذا العقيق النادره بين الألماس
ياجوهره.. يا كبرياء العناوين=يا جنس نادر.. فارعٍ بين الأجناس
يا أحلى قصيده دونت في دواوين=كلاً قراها مدوّنه وسط كراس
ياعود غصنٍ منثني في بساتين=انتي الأميره لا ولا شيخة إحساس
إحساس يعني ساريه بالشرايين=متمكنه فيني من الساس للراس
في حق حبك سقتها وين ياوين=شاعر وعمري فاقده فيك ياياس
خليت لك قلبي بهالعيد قلبين=وأنا أتوووق متايق الطير قرناس
الشاعر:جارالله الشدي