جتني تعاتب والعتب تستزيده=
يا زينها ويا زين حتى عتبها=
قالت تجيد الشعر ؟ قلت إيه أجيده=
( هي جت كذا ) لازم أنفذ طلبها=
قالت أبيك تقول فيني قصيدة=
أبي الجموع تصيح منهو كتبها ؟ =
ابي القوافي والمشاعر فريدة=
ابيك تتعبني وأحس بتعبها =
أبيك تلعب في بحورٍ جديده=
أنت الوحيد اليا لعبها .. لعبها =
تكفى طلبتك يا محمد الوليدة=
جبها على الطاروق يا شيخ جبها =
المشكلة طفلة وطفلة عنيدة=
قبل سنة قطت بقايا لعبها=
واليوم سيد الناس تصير سيده=
كم سيد قوم جا لبوها خطبها =
يلعن ابو جد الشعور وكديده=
إن كان ما ولّد قصيد بسببها =
الزين من ربي ويعطي عبيده=
مهي من اللي زينها في ذهبها=
وإذا نوت حي تكيده ... تكيده=
يا قبلة الله يوم ترخي هدبها=
ويا شعرها لامن عصاها تعيده=
للخلف ويغطي مثاني ركبها=
والطول يا أهل الطول عنق الفريده=
طولي إذا قطت صغيّر كعبها=
وشلون أعدد من صفات عديده ؟=
يكفي تأدب جيلها من أدبها=
عندي قريبة بس عني بعيده=
وهي مسألة صعبة على من حسبها=
يا الله عساني قلت فيها قصيدة=
وعسى قصيدي يا جماعة عجبها=
محمد الدهمش