ياعيني النجلاء ورى النوم جافيك=الظاهر انك والسهر صرتوا احباب
ماضنتي تشكين خلٍ غدر فيك=اكيد بك هم القرايب والاصحاب
وين انت يانور الحقيقه والاقيك=تعبت ادور في متاهات الاغراب
احترت في واقع غريبٍ يخليك=تعجز تميز بين صادق وكذاب
كلٍ ليا جيته من الهرج يعطيك=ولا اقفيت من عنده يلحقك مشهاب
بعض العرب طبعه من المر يسقيك=بعيد كل البعد لو هو من اقراب
ماكنه الا واحدٍ ما يدانيك=على مطيحك يبذل أسباب وأسباب
وين الصديق المخلص اللي يصافيك=اللي بقلبه للوفا فاتحٍ باب
اللي ليا من غبت ياقف ويحميك=طبعه كذا حتى ولو هو من اجناب
ياساعيٍ بالهرج ربي يجازيك=عساك تبلى في طويلات الانشاب
والا عسى المولى يردك ويهديك=وتصير تحسب للعرب قدر وحساب
الشاعرة:قوت القلوب