كان الزمن يا فاتني ما عاجك=هذا أنا بالصوت لك ناديت
محتاج لك يا منيتي محتاجك=لا تعتذر وإلا تقل ياليت
طامع تروق ويعتدل مزاجك=لبيه كانك للطلب لبيت
ما مقصدي واللي خلق إزعاجك=ياللي بقلبي بالغلا حليت
القصد أبيك تفل بس حجاجك=وأعطيك مني كل ما حبيت
تروى ويروي خاطري هداجك=من نبعك اللي منه ما مليت
سكر بشهدٍ(ن)مازجه ممزاجك=طب لفؤادي كل ما ونيت
أرشف غرامك وأقتدي بسراجك=وأدعي تزيده كل ما صليت
مالي سواك ومنتهج منهاجك=معي طيوفك وين ما حليت
أسمع صدى همس الهوى وغناجك=لو كان يا نبض الغلا ما جيت
الشوق وأحلام السهر كرباجك=لا زارني طيفك بها حييت
خلف الضلوع بخافقي ميلاجك=مكانك اللي فيه أنا هليت
يا صعب من قلبي ترى مخراجك=تبقى بقلبي حي وإلا ميت
باب الغرام محكمه مزلاجك=القلب واحد وأنت به دشيت
ما بين قلبي والعقل معراجك=ياللي بحبك من زمن طبيت
رقيت من زود الغلا بدراجك=وأشكي لك أحوالي وما عانيت
أشكي عليك وخاطري هراجك=وأنطر جوابك كيت وإلا كيت
كان الزمن يا فاتني ما عاجك=هذا أنا بالصوت لك ناديت