يا هوى البال مالي بالهوى حيله=يشتعل في خفوقي كنه الوقاد
ويل حالي من الأشواق وإبكي له=يمكن يحن قلبك والفعول تشاد
ودي بشوفتك لو ساعه بليله=ليت الأيام تجمعنا على ميعاد
وأحسن شوي لو هي بيتة وقيله=الهنا في لقانا يقهر الحساد
والله إني عرفتك مأنتِ(ي)بخيله=مير دونك حوادي من عرب وبعاد
والهوى في خفوقي جامحة خيله=كن حبك بقلبي فارسٍ(ن)بجواد
يدهج في حشايه وأشتكي ويله=أحرم النفس للراحه وشرب وزاد
كل ما قلت بصبر زاد في كيله=حارب العين عن هجعة بليل رقاد
كن عيني بليلي عين دربيله=وكن طيفك لراسي يا غلاي وساد
كل ما جاب فكره كني أصغي له=عل فيها علاج لجرحي المعتاد
أتقلب على الجنبين وأشكي له=من جروح الهوى بالنابض المنقاد
قاده الحظ في حبك وعزي له=ما حصل له مراده والوصال مراد
ليت حظي تجمل كان بدعي له=مير حظي غدر بي والزمن ما جاد
هب يا حظي اللي غيًب كحيله=غايبه والهوى في داخلي رعاد
روحت وتركت لي داخلي غيله=كيف يبرى جريحٍ(ن)ما عنه نشاد
سلوتي في غيابك ونة وشيله=أسهر الليل كله للشعر نشاد
ما نفعني قصيد وزادت الميله=والعنا في خفوقي يا غرامي زاد
يا هوى البال مالي بالهوى حيله=يشتعل في خفوقي كنه الوقاد