حسافة يا زمانٍ(ن)راح ضيعته على الفاضي=رجاوي في حلوم من الشباب وعادني شايب
رحل وقتٍ(ن)طويل وعن رحيله ماني براضي=ياليته قبل يرحل جاب لي مضنوني الغايب
يا جنة عمري المقبل يا حلم لعمري الماضي=تعالي سامريني لين يطلع صبحنا الأيب
نبي نروي عروق الشوق من معسول بالحاضي=يداوي للجروح اللي لها بأعماقنا صايب
جروح العشق تنزف جالها وسط العظم شاضي=تعبنا والدوا بيديننا مير البخت خـايب
تلاقينا يداوي يا هواي قلوبٍ(ن)مراضي=نطيب ونمسح هموم البعاد وشوقنا دايب
تعالي دام برق الشوق لعيون الهوى ناضي=تعالي أمطريني بالغرام وماني بتايب
أبي أشرب مراويحك وذوقك يا غلا قاضي=عسى الله يحفظك يا درةٍ(ن)ما جا لها نايب
غرامك مالك أعماقي بغيرك صعب ينعاضي=محال ومستحيل أعشق سواك ولاني بطايب
قضيت العمر في حبك ولاني عنك متغاضي=أبي أمشي معك لين النهاية بالهوى ذايب
على شأنك ومن شأنك سنين طوال وعراض=تبعتك يا بعد كلي ولاني للعنا هايب
هنا خلف الضلوع العوج حبك لي خضاضي=يخض لخافقٍ(ن)ماهو بداري ويش لي جايب
على شأنك بضيع للعمر لو راح بالفاضي=رجاوي فيك من وقت الشباب وعادني شايب