بمناسبة سفري لمصر بتاريخ 2016/4/3
يا كبتن طايرتنا قول بسم الله تعد الغيم=على متن السحاب اللي بروقه تحت وأنته فوق
وقرب لي جهاز المبرقات وفك رمز النيم=بطمن صاحبي إني بخير وبالسحاب بروق
موصيني على روحي وبرسل للغلا تسليم=سلام الله من المشتاق للي جننه بالشوق
تطمن يا رفيق القلب يا مشبه عنود الريم=يا كامل بالمحاسن والأدب يا محتلي بالذوق
قسم باللي خلقنا يا غلا ترى القسم عظيم=هواك بكل ذرة بالجسم والفكر والخفوق
محال أنسى غرامك دام روحي في هواك تهيم=أحاسيسي بحبك يا حياتي للكلام تفوق
الا ياليت لك قاموس وحدك وأقبله تحكيم=يبين لك غرامك في خفوقي وأترك المنطوق
لكن أرجوك تقبل للعذر عداك ظلم وضيم=يا بلسم جري النازف يامالك بالهوى المعلوق
بسافر بك بقلبي ثم برجع بك سلم سليم=ليا شاء ربنا يا بسمة أيامي بليا عـوق
لكن وداعتك روحك عسى ربي عليك يديم=أمانه والعوافي والسعادة في فكر وعروق
وصاتي يا موصيني تواصلني تراك فهيم=الك فوقي حقوق ومثلها فوقك عليك حقوق
أنا نفذت لك مطلبك وأنطر مطلبي بالتيم=عسى ربي يحفظك يا مزين كامل الطاروق
على شأنك ومن شأنك كتبت الشعر والتختيم=بأمان الله يا نبض القلب ما أنته بالغلا مسبوق
يا كبتن طايرتنا قول بسم الله تعد الغيم=على متن السحاب اللي بروقه تحت وأنا فوق