قالت بسولف قلت هاتي سوالف=قرب و سولف علي عن الحال يا زين
قالت شوي اجيك مثلك وعارف=قلت انتظر والا تقولين بعـدين
قالت لا والله صادقة ليش خايف=قلت العذارى بالمواعيد حذرين
قالت بروح أفطر دهون وقطايف=ما رايح ابطي كلها بس عامين
قلت افطري بالعافية ما يخالف=لا تعجلين انطرك لو كان قرنين
الوقت ما يمنع وصال الولايف=والبعد ما يمنع غرام المحبين
غيبي على كيفك حساب المصارف=ما يختلف مهما تغيبي تردين
وأنا هنا ما عشت يا بنت واقف=أنطر متى يمي بعينك تلدين
وإن كان ما جئتي كسبت الحسايف=وأنتِ(ي)فداك الحال بالعسر واللين
ما دامني بديت روس المشارف=ماني بنازل لين يا بنت تلفين
ما يترك لماقفه يكود عايف=وأنا على ما كنت وأنتِ(ي)تخبرين
عندي سواليف وفعول وطرايف=زينتها باللي لعمرك تحبين
يا كيف كيف اللي يبي كيف كايف=معك السوالف يا أريش العين بتزين
يا زينها لن جات عرف وتعارف=لا والله أجمل شوفة العين للعين
أما على ميعاد وإلا مصادف=في كل حال الجو يصفي من الشين
على البحر وإلا بجو المصايف=معك السوالف تمسح لضيق صدرين
تعال سولف وأخذ مني سوالف=قرب و سولف علي عن الحال يا زين