أسعدكم الله
الأبيات بدون مقدمات
...
مشتاق لك يا شمعة الليل مشتاق=البعد زود لوعتي واشتياقي
حبك تغلغل في عروقي بالأعماق=كل عرق فيه إحساس للحب ذاقي
ذاقه ومنهو ذاق للحب ما لاق=يطلق خياله فوق ما كان هاقي
كنه على ماقيل في حلبة سباق=بين العمر والحلم قايم سباقي
ما يدري إن الحظ لا كان منعاق=يبدي على سر الهواوي رواقي
الحظ يحبي والعمر راكب براق=والشوق والحرمان تأبى طلاقي
جمر الهوى للكبد والقلب حراق=لا زاد عن حده تركها حراقي
قلبي يصارع سكرة العشق ما فاق=والعقل راح ولا بقى منه باقي
سرقه حبك سرق والود سراق=أسر معاليقي وجود وثـاقي
القلب ينزف والفكر صلف ما راق=اللي مضى من عمر صعب اللحاقي
ركضت لين الركض نشف للأرياق=وأمسيت من زود الحسايف معاقي
ما عدت بقوى غيبةٍ(ن)عنك وفراق=لو الزمن يعطي بشاير فراقي
أنا لقربك يا هوى الروح تواق=طامع بيوم يحين فيه التلاقي
يمسح زمان الهم ويلم عشاق=في جنة العشاق فيها نلاقي
ما تشتهيه النفس من ضم وعناق=تبري جروحٍ(ن)بالحشا يارفاقي
قدام لا تلتف ساقٍ(ن)على ساق=تروي مشاعرنا عيونٍ(ن)سواقي
نكتب لنا ذكرى على بيض الأوراق=قصائدٍ(ن)عذبات حلوة مذاقي
أقول لك مشتاق مشتاق مشتاق=القرب زود لهفتي وإشتياقي