أسعد الله أوقاتكم بكل خير
الأبيات
....
يا نجمة العصر مدري يا شبيه الملاك=يا ملهمتني قصيدي لين زان الشعر
حلو القصائد تراها نابعة من هواك=يا نادرة بالجمال اليوسـفي بالبشـر
في ذمتي ما سحرني بالعذارى سواك=هذا خبر كان ما عندك بسحري خبر
سحرتني بالأدب والذوق زايد حلاك=يا منتهى كل حواء من جمال وطهر
كل يوم يكبر بقلبي يا غرامي غلاك=ما عاد شيءٍ(ن)سواك يسرني بالنظر
يا بلسم جروح عشقي عجلي لي دواك=قدام روحي تروح انا بحالة خطر
ترى الدوا ما يفيد اليا وصلت الهلاك=ما عاد يشفي علاج ولا يفيد الصبر
أنا دخيلك وداخل فوق منهو رباك=لا تتركيني ضحية غيبتك وإنتظر
ما عدت بقوى لصبر ومنتظر في حراك=يا مر صبر البعاد وجاير الشوق امر
صبرت لين الخفوق اللي بصدري شكاك=على زماني وقلبي من هواه إنفطر
العمر والله خسارة كان ماهو معاك=أيامي اللي معك تسوى لكل العمر
باقي سنيني وعمري يا غناتي فداك=خسرتها مثل منهو بالتجارة خسر
ما باقي إلا مكانك في فؤادٍ(ن)شراك=هذا نصيبي من الدنيا وحكم القدر
كلي لكلك هدية والعمر في يداك=اهديتك اللي بقا لي من زمان وفكر
قلبي وفكري وشعري والغلا ما نساك=يجع طيوفك خيالي وأنسجم وأنبهر
من غيبة الشمس لين النور زاح الحلاك=أجمع شتات الحلوم وبينهن أنتثر
أسلي النفس دامك مبتعد ما براك=ما عاد لي سلوةٍ(ن)إلا قصيد ونثر
أكتبك قصة غرام لشاعرٍ(ن)ما سلاك=تقعد للأجيال بعدك عبرة لمعتبر
نهاية العلم عندي قبل هذا وذاك=أنتي غرامي وهذا علمي المختصـر
يا نجمة العصر مدري يا شبيه الملاك=يا ملهمتني قصيدي لين زان الشعر