الأبيات بدون مقدمات
علموها مستحيل انسى هواها=ذي حقيقة كان تجهل للحقايق
قلبي اللي ضمها عاشق غلاها=ما يبدل عشقها لو كان ضايق
لو تغيب العمر كله ما نساها=هي دواه وعلته ضايق وفايق
وعلموها دام عيني ما تراها=ما بقا لي من عمر ماني برايق
دام روحي ما تهنت في دواها=جرح قلبي مهلكه ماهو بطايق
بتوجع وأتجزع من جفاها=لين فوقي تنحني سود الطبايق
وعلموها يا عسى ربي يحماها=من شرور الوقت ودروب العوايق
دامني عجزت لا أحقق رضاها=بدعي الله للغلا من كل لايق
يا عسى كل العذارى من فداها=جوهرة ما مثلها بين الخلايق
علموها مستحيل انسى هواها=ذي حقيقة كان تجهل للحقايق