الأبيات بدون مقدمات
الليل يا قافي بسرعة تجهز=وصل سلامي للغضي بالتساهيل
قل له ترى شاعرك في رده اوجز=جئتك بموجز علم ماهي تفاصيل
مرسل معي ردٍ(ن)من الهاجس أنجز=سلام من شاعرك ويقول بالقيل
سلامة اللي قلبها للشعر فز=تقول كنه بالصدر حافر الخيل
سلامة لقلبك من الفز والنغز=وسلامة عيونٍ(ن)هدبها مظاليل
كلامها من قالته هزني هز=بغيت اكسر دلتي والفناجيل
غديت انا سواة ميٍ(ن)على قز=الدم يغلي والمشاعر محاميل
ودي بضم اللي نكز خافقي نكز=ما عاد تكفيني جميع المراسيل
حرق فؤاد مثل ما يحرق الرز=سوى بقلبي للمودة مداهيل
على المحبة والهوى لزني لز=مدري غلا وإلا يحب التعاليل
قمت أتمنى وأبدع القاف وأغز=حلمٍ(ن)حلمته لليال المقابيل
وإن ما تحقق مطلبي عزني عز=ياللي على قلبي تسوق الغرابيل
وإلا تجمل قول حييت وإبتز=قلبٍ(ن)تعلق فيك لا تشكي الويل
هذا قصيدي فارزه بالعقل فرز=واضح وضوح الشمس والبدر بالليل
مرسله للي دمها بخدها نز=والعين مدعوجة بحلو المكاحيل
الصدر مثل طويق زامي ومرتز=والعنق عنق مذيراتٍ(ن)مجافيل
والمعذرة ترى الميانة من العز=لولا الغلا ما كان قلت التماثيل
لكن يا قافي بسرعة تجهز=وصل سلامي للغضي بالتساهيل