أسعدكم الله
الأبيات كالعادة بدون مقدمات
شهرين نومي ما تهنيت به ليل=اسج فكري والقصائد مطايا
هواجسي من حر مابي محاميل=من جرحي اللي تحت عوج الحنايا
مواجعٍ(ن)سوت بفكري مداهيل=ما كنها إلا طالبات لشقايا
جرح فؤادي كاحلات المظاليل=اللي شغفهن بالكحل والمرايا
نواعسٍ(ن)من شفتها صابني ويل=يا ويل حالي من عيون الصبايا
نجل العيون الصافيات المكاحيل=سوت بحالي يا زماني سوايا
ورد الخدود مسرحات المجاديل=بيض الكفوف اللي بنقشه زهايا
عِذْب الكلام مرقصات الخلاخيل=تنهب لعقلي بالكتوف العرايا
ريح الزهور معطرات المناديل=تسرق لروحي نادرات الحلايا
مفاتنٍ(ن)بتكبل القلب تكبيل= اخذت لقلبي والمشاعر سبايا
كل ليلةٍ(ن)احط بالفكر واشيل=من عقب نادت بالغرام النحايا
احلم بشوفه بالليال المقابيل=أبيه حاتم بالكرم والعطايا
ما أبي حبيبي بالعطاء مده بخيل=أبيه جزلٍ(ن)بالوفاء والهدايا
وأنا لعينه مرخص الروح والخيل=لا من طلبني قلت روحي فدايا
لو يطلب المريخ جبناه وسهيل=أغزيه لعيونه بقومٍ(ن)طنايا
في واجبه ما نكتفي بالمراسيل=لا من نخانا فاح دم الحمايا
أفعالنا تسبق هل الحكي والقيل=كرمان عينه ما نهاب المنايا
يا صاحبي صاحبك شيح الرياجيل=ستر العذارى لابسات العبايا
لو كان حبك غربله بالغرابيل=الحب ما يخلف لحسن النوايا
نشرب قراح العد ونصفي الغيل=نارد ونصدر للعدود الرهايا
ننهل قراح العد لو كانه محيل=نشرب ونروى والخلائق ظمايا
بمسلباتٍ(ن)مرهفاتٍ(ن)مصاقيل=شيءٍ(ن)مواريثٍ(ن)وفيها شرايا
نشرب على عز النفوس الفناجيل=أفعالنا ترسي حميد السجايا
لأجل الوفا ما يضعف العزم والحيل=ولا نلتفت لأهل الهتل والزرايا
حسب العوايد نوفي الحق والكيل=لو القلوب من المطالب طوايا
ما نأخذ لشار الرخوم المهابيل=أهل العقول الفارغات الخوايا
دام الشهامة راس مال الزواحيل=باق المراجل للرجولة زكايا
شهرين نومي ما تهنيت به ليل=اسج فكري والقصائد مطايا