الشاعر عبدالرحمن

صح لسانك وفيت وكفيت ولي الشرف بما تهيضت به

شفت ردك وانا بالاستراحة فكتبت هذه الأبيات على السريع

بالجوال والمعذرة مافيه تنسيق لكن بمشئية الله اذا رجعت البيت أنسقها وانزلها مستقلة

والمعذرة لو فيها اي خطأ .......


يا ذيب ياللي في علو الأشاعيب=تعوي بعد حافك من الجوع حايف

الجوع غرز في حشاك المخاليب=أرخيت له راسك ولا هو بطايف

واليوم تعوي من حروق المشاهيب=تقنب وحيد(ن)بالطويل المهايف

فضحتنا عند الأهل والأجانيب=تبا الربيع وتنتوي للمصايف

خل الهوى لمعكفين الأشانيب=اللي يخلون الصعايب عسايف

لا صرت ما تقوى لماقف مصاليب=عذر ودور للعلوم الطرايف

سيف الهوى ما ينصي بالمشاعيب=وأهل الأشدة ما تعود ردايف

يا شاعر الهذلان معك تحاسيب=ما بين نار ونار تبغا قطايف

تبا الجمالة والجمل والمحاليب=ودك بذي وذيك والرب رايف

وإن كان بدلت القنا بالمغاريب=ما عاد أنا وإياك ربع وحلايف

بعد الهوى قطع زرار التلابيب=أشوف بعلومك شبيه الخرايف

ارتاح من كثر العنا والهناديب=غط العلوم الماضية باللفايف

صل الفروض وصوم والمال بالجيب=غمض عيونك لا تشوف الرهايف

الموت لو يمهلك ما ماهلك شيب=يكفيك من دنياك ماض الغرايف

يا ذيب ياللي في علو الأشاعيب=تعوي بعد حافك من الجوع حايف