أسعد الله أوقاتكم بكل خير
الأبيات بدون مقدمات
علها تروق لكم
ياست الكل حبك صار لي بين البشر سيره=تولعت بغرامك يا عساني يالغلا ما أبكيك
كساك الحسن يا بدر الزمان وشمعة الديره=يانور العين نبض القلب ليش تعذبي مغليك
ذبحتيني بحبك والعذارى صابهن غيره=يغارن البنات من القصيد اللي كتبته فيك
ما يدرن الهوى شيب لناسٍ(ن)توها صغيره=وجنن قيس من ليلي عسى رب الملا يحميك
سقم حاله مثل حالي وليلى عجزت تجيره=مواجيع الغرام اللي تجيني علها ما تجيك
أحس بداخلي من لهفة الأشواق تفجيره=شظاياها تمزق بالحشا من كثر ما يطريك
سنين تمر وأنا يالغلا من حيرة بحيره=على منهو سواك أشكيك لا مني بغيت أشكيك
طيوفك كل ليل تمرني للفكر تصبيره=وقلبي لو معه جنحان طار من الصدر يبغيك
لكن الله كتب ماهو كتب يا علها خيره=بصارع للصبر لو هو مرار ولا نويت أنهيك
أحبك وأعشقك وأهواك لو تولع النيره=بقلبٍ(ن)ما سكنه إلا هواك وبالوفا يشريك
مجازف في غلاك ولو حصل مليون تعويره=مسح كل النساء من ذاكرته وصار لك تمليك
تربعتي على عرش الفؤاد بدون تكبيره=هدية من محبٍ(ن)غايته باللي ملك يرضيك
ترى وصيت قلبي فيك كل نبضة وتمريره=يوزعك بشراييني وأنا فوقه بعد بوصيك
كذا وإلا كذا ما عاد لي بالأمر تدبيره=غرامك صار لي واقع بلا ريبة ولا تشكيك
ياست الكل حبك صار لي بين البشر سيره=تولعت بغرامك يا عساني يالغلا ما أبكيك