البارحه كثرت علي التفاكير


البارحه كثرت علي التفاكير = امسيت انا والشعر زند وذخيره


هاجوس فكري يسبح ابحور ويغير = ويجيب لي الاخبار من كل ديره


وقام ايتفنن وابدع ابكل تصوير = من كل حاسد اطلب الله يجيره


ياالله يالي تعلم الشر والخير = طالبك يارب البشر كل خيره


امسطر الاعمال في اللوح تستطير = ماغاب عنه شي كبر الشعيره


امدبر الارزاق والكون تدبير = يعطي عباده والعطايا كثيره


الناس كلن له طبوع ومسايير = وكلن من الايام يلقى مصيره


خاوي الرجال الي كرام ومسافير = الي لهم في الوقت وقفه كبيره


الي تعاملهم محبه وتقدير = والي لهم شيمه وقيمه وغيره


اهل الوفاء والطيب قوم (ن) مناعير = تلقى بهم في الضيق من تستشيره


وابعد عن الي صحبته مابها خير = الي يزود في الهروج الصغيره


والي يشب النار ينفخ على الكير = والي العلوم التافهه تستثيره


من صحبته ماتجني الا المخاسير = ماتنفعك وياه صحبه وجيره


مايوم تلقى منه خير وتباشير = يشب بين الناس دايم سعيره


ينفث سمومه في عروق الجماهير = باالقلب الاسود والنوايا الخطيره


ولاتتبع اهل الفن واهل المزامير = الي لدرب الشر صارت سفيره


وختامها عداد ماغرد الطير = صلوا على الي سيرته خير سيره