أسعدكم الله
الليل رفيق الشعر
اليكم ما جادت به هذه الليلة
لا طازج الا الطازج
الأبيات علها تروق لكم
يا بنت الحلال الليلة الفكر مرتج=تعالي تعالي عدلي لي مزاجي
تعالي قبل نور الفجر ينبلج بلج=ليا كان ودك تفرحي بانبلاجي
تعالي تعالي واقصري طايل الهرج=وجودك بجنبي فيه طب وعلاجي
تعالي بجنبي تشعري صالي الوهج=مثل لذعة الكهرب بروس البواجي
تعالي وفكي عقدة القلب بنسج=مشاعر هوانا وإسرجي لي سراجي
تعالي نبي نمزج هوى أرواحنا مزج=نطفي لشوقٍ(ن)داخل الجوف لاجي
تعالي وسقيني من الدل والغنج=نبي نسهر الليلة بفلة حجاجي
تعالي حصان الفكر يجمح بلا سرج=وأنا ضعت مع ركضه بوسط العجاجي
بعد كنت عالي فوق في قمة البرج=أحس بفؤادي صار فيه ارتجاجي
ومزلاج باب القلب ما يقبل الزلج=حصل في مصد الباب بعض انعواجي
تقفل على كنز الهوى داخل الدرج=وقفل زماني يا غلا لابتهاجي
جنون المشاعر داخلي صوتها لج=ولا ني بشايف للهموم إنفراجي
جنون الهوى فوق الهوى تزجني زج=تهشم لها قلبي تهشم زجاجي
سحائب غرامك وبلها داخلي ثج=سنينٍ(ن)عديدة ما لقيت لخراجي
ملكني غرامك ماني بقادر أهج=على وين ما هجيت راصد هجاجي
البي على شأنك بلا عمرة وحج=رجاوي بلطفٍ(ن)منك لا زلت راجي
تجيني قبل لأقوم وأشكيك وأحتج=وأسجل على نبض القصيد احتجاجي
وأنا لو طلبتيني بلا لتٍ(ن)وعلج=أسيب المشاغل لأجل خاطرك وأجي
يا بنت الحلال الليلة الفكر مرتج=تعالي تعالي عدلي لي مزاجي