أسعدكم الله
من تسجيلات جوالي أبيات سجلتها قبل سفري من عند ام العيال بليلة
ولم أتمكن من تنزيلها بالمنتدى بوقتها
اليكم الأبيات
تجهزي يا أغلى من الروح والعين=نبي نسافر بالربيع نتمشا
ترى السفر بديارنا يالغلا زين=وليا لقينا روض فيه نتعشا
نبي نغير جونا والملل شين=لا صاب قلب المودماني تفشا
محتاج لي ارتاح بالعمر يومين=من ضيق احسه داخل الصدر خشا
محتاج اجدد للدمي بالشرايين=تصفي ويصفي فكري المستغشا
وفي دربنا بنمر طه مصلين=على النبي اعداد ما الغيث نشا
في مسجده بنقيم لو كان فرضين=تنفع لنا في يوم فيه نتغشا
من بعدها يالغالية دربنا يمين=صوب القصيم وكل ديرة معشا
نبي نتفرج في خضار البساتين=بالديرة اللي ما نحاوج لفرشا
ونبي نروح العاصمة ثم بعدين=الساحل الشرقي له القلب عرشا
ودي أريح فيه مقدار شهرين=الساحل الشرقي على الروح هشا
قالت:توكل روح عندي وراعين=مع السلامة كل حلِ(ن)وممشا
قلت:العيال كبار ما هم صِغيرين=والخير ياسر ما يعيزون قرشا
قالت:يزيد الخير مولاك خيرين=لو رحت عنهم صارت العين عمشا
قلت:أعرف بردك قبل لا تردين=العين ما ترتاح من غير رمشا
مير اقعدي يا أغلى من الروح والعين=وأنا بسافر بالربيع أتمشا