أسعد الله كل أوقاتكم بالخير والمسرات
اليكم الأبيات
علها تروق لكم
يازايرين ديار الأحباب بالله=من شاف لي صاحب من العام غايب
أنشد عنه وأدوره وأتمناه=أتعبت من شانه جميع الركايب
أدوره بالبر والبحر لو جاه=وأنشد عنه حتى ذوار الهبايب
ياليتني عقب العنا يوم بلقاه=يافرحتي لو عاد سيد الحبايب
تبرا جوحٍ(ن)جاتني عقب فرقاه=أنسى ليا شفته جميع المصايب
هُو علتي هُو بلسم الجرح ودواه=ما له بديل ولا عرفت له نايب
سقم لحالي بالهوى لا عدمناه=شيب لرمش العين والراس شايب
عسى العذارى كلهن من فداياه=زهرة حياتي فيه حُسن وعجايب
من هامته الين مخمص بماطاه=مافيه عيب ولا يشوبه معايب
ماله شبيه و لا لقينا حلاياه=أقرب لروحي من قريب القرايب
أهواه وأعشق كل ماهو بيهواه=وأعشق لذوقه والعطر والذوايب
ماني بتارك صاحبي لأجل عيناه=عن الهوى لأجله فلاني بتايب
مهما يطول الوقت ما والله أنساه=حتى يحطوني بلحد ونصايب
بدوره وأعيش دايم لرجواه=عله يعود ونقهر لحظ خايب
يازايرين ديار الأحباب بالله=من شاف لي صاحب من العام غايب