أسعدكم الله أينما كنتم
وجهت لسعيد الله يذكره بالخير ذات الحسن والجمال اللي عمرها فوق ستين
و وجهت لوصل الشهيب طال عمره الطفلة المدللة
وها انا أوجه لعثمان الثبيتي هذه الفروع وضوحها كوضوح الشمس
علها تروق للشعراء والجمهور
أمس وجهت الرسائل على وصل الشهيب=سالفة يا ثقلها جابةِ(ن)ياخفها
ثم دارت وإستدارت على البد القريب=فوق عثمان الثبيتي قصيدي دفها
يارفيقي وضعنا صار بالدنيا غريب=لو بغيت تلفها ما قويت تلفها
الأسد عود حصيني وصار البس ذيب=والمصيبة لو صفك خلاف لصفها
علةٍ(ن)بالوقت يصعب يداويها الطبيب=النعامة طير تأطا نمور بخفها
ياوسيع المعرفة ياللبيب بن اللبيب=التجارة خاسرة والبضائع صفها
جفت الفضية وبانت ضفادع بالقليب=لا بلانا ربنا بسف يشبه سفها
البوادر ما تبشر بسمن ولا حليب=اليدين اليابسة من يلين كفها
كل ماقلنا تزين الأمور تزيد عيب=والعرب يا صاحبي ما تحقق شفها
شمسنا يا صاحبي مدبحة يم المغيب=طال ياعثمان فوق الآوادم كسفها
الحياة مقفية والبلا قطع النصيب=الليال الغبر قامت تدف بكتفها
بالزمن ماعاد نعرف خطاوي من مصيب=والنفوس الطيبة عند ربك لطفها
أمس وجهت الرسائل على وصل الشهيب=سالفة يا ثقلها جابةِ(ن)ياخفها