أسعدكم الله
اليكم ما جاد به الخاطر
يالله يارحمن منك نترجا=ترسل لنا رحمة بوبل المخاييل
حس الرعد صداه بالضلع لجا=أشوف مزنه والمخايل مقابيل
عسى سحابٍ(ن)رجه الرعد رجا=يسقي من الطائف إلى وادي السيل
سحاب ريض ما يعكره عجا=ياخذ سبوع الوبل بالصبح والليل
يرو الفيافي والمطامن يخجا=لين المسايل كلها تجري بغيل
نجله من الصرف الحمر لين بعجا=يحيا نخلها والحبق زود تجميل
الغيث يحي كل ضلعٍ(ن)وفجا=والأرض لن عاشت تزيد المحاصيل
بعد سبوع تصير بالنبت مرجا=يحيا الزهر ويعيش نحل المناحيل
يرجع لها حيٍ(ن)من القحط هجا=تنبت غصونٍ(ن)حافها اليبس والويل
الدهر ذيب الأرض ما منه منجا=مثل الفقر بالوقت ذيب الرياجيل
وإن زانت الأيام بيزين هرجا=في مجلسِ(ن)كيفه بصفر المعاميل
مافيه لا شاني ولا فيه سمجا=من عزوةٍ(ن)أقلهم يعدل الميل
نقرأ كتاب العرف ماهو نتهجا=ونعدل محاوج من العرف تعديل
نأخذ ونعطي والفكاير تسجا=ركايب الأفكار دايم محاميل
نطعن صدور بحور ونغوص لجا=ونرجح الميزان ونوفي الكيل
نأخذ لما هو زين والشين يُرجا=ما نندفع بالهون للقال والقيل
يالله يارحمن منك نترجا=ترسل لنا رحمة بوبل المخاييل