أسعد الله أوقاتكم
كالعادة اليكم الأبيات بدون مقدمات
سامريني ياطيوفه بعد ما عز بوصاله=لين يطلع فجر بكره والسهر للعين عاده
لي شهورٍ(ن)ما يجيني نوم والراحة محاله=ما تهنا بي فراش ولا تهنت بي وساده
ودي بشوفة غرامي وأتطمن وش حواله=مير حال البعد دونه وإنحرمت من السعاده
أتصبر بالقصايد وأتصبر بالمقاله=لين باح الصبر مني وانحسر عقل ورشاده
أشتكي جرحي لروحي بان بالحال إعتلاله=من سبب هجران منهو ماسك زمام القياده
العنود اللي لها قلبي نبض والشوق طاله=وأشعلت فيه الغرام ولا لحق منها مراده
لو صفت له بالمشاعر ما تصدقها فعاله=الظروف أقوى من المقدور وأحكام السياده
حايلة بينه وبيني كدرت حالي وحاله= لين صار الهم مشروب الهوى والضيم زاده
تركض الأيام والأعمار تنذر بإرتحاله=الكبود يبوس وأحلام العمر تشكي زهاده
ماصفا لي وقتي المنحوس وأيضا ماصفاله=كل ما قلنا يزين الوقت زود في عناده
سامريني يا طيوف اللي جميلاتٍ(ن)خصاله=صبريني لين ياتي والصبر يحسب عباده