أسعد أوقاتكم بكل خير
واليكم الأبيات بدون مقدمات
مشاعرك دقت على قافي أجراس=وفي ساعتي لبيت لبيك لبيك
هذا جوابي ما كتبته بقرطاس=رد الهدية مثل ما أهديت بهديك
لو العطا يازين يوزن بمقياس=بعطيك غال الروح والعمر يفديك
هديتك أغلى من كنوز الألماس=أغليتني والفكر والقلب مغليك
أنا أشهد إنك نادر بين الأجناس=عسى كريم الوجه يازين يحميك
يحميك من ماطاك لا هامة الراس=من كل زين وزين يا فاتني فيك
فيك الأدب والذوق وأنسام نسناس=سبحان من صورك وأبدع مواريك
جاني جوابك يحمل أطياب وإحساس=هز الكيان وصحت بالحال هاويك
جايك وأنا كلي من الشوق محتاس=وإن قلت لي:وش مقصدك قلت:شاريك
قلبي سواة الجمر في ليل قباس=وده يضمك من شتاك ويدفيك
أسمع صدى نبضه مثل ركض الأفراس=لو ينطلق من داخل الصدر بيجيك
غيرك بقاع الكأس وأنتي ملا الكاس=تشرب عطش ودي وأنا نفسي أرويك
وأشرب عطش بعدك يحرق للأنفاس=وأنا مناي بدم شرياني أسقيك
أهد وأبني وأضرب أخماس بسداس=والقا الزمن والبعد والحظ حاديك
وأرجع على ماكنت ياسٍ(ن)على ساس=تنزف جروحي والمشاعر تناديك
مشاعرك دقت على قافي أجراس=وفي ساعتي لبيت لبيك لبيك