--------------------------------------------------------------------------------

يا بوي انا آسف على كل ماصار * وانا على أمرك ولايمكن اعصاه


الناس تخطي كلهم حكم الاقدار * والخير بللي تاب عن ذنب سواه


أنا ترى يابوي لك سيف بتار * يكسر عيون اللي تحاول تعداه


وعد علي يابوي في كل مضمار * اني لشرّف شيبتك وارفع الجاه


مهما بخلت ارجع محاصيل وثمار * لنّ الكرم أصلي ولا يمكن انساه


ماني بمثل اللي منافق وبوار * أنا منللي لا طلبته بتلقاه


ودي أقدم لك عيوني والابصار * رضاك عندي غايتي واتمناه


من غيرك اللي يشعل دروبي انوار * ويزيل عن روحي الكدر والمعاناه


مهما كتبت اشعار واشعار واشعار * ماراح أوصل حد نهرك ومجراه


ياسيدي تفداك روحي والاعمار * وش فايدة عمري بدونك ومعناه


أدعي اله الكون علام الاسرار * يحفظك من كيد الشياطين وعداه


ويطيل في عمرك لنا سيد الدار * نورك يضوي كل داجي ويجلاه