مساكم/ صباحكم خير إن شاء الله
واليكم الأبيات
وينه رفيق الدرب والعمر وينه=له مدةٍ(ن)ماعاد نسمع له أخبار
حال القدر والحظ بيني وبينه=كل واحدٍ(ن)منا غدا اليوم في دار
الله يعين الحال والله يعينه=تدبيرنا بيدين علاًم الأقدار
العبد رزقه منكتب في جبينه=من يوم مولدنا ليا تال الأعمار
نعبر على الدنيا سواة السفينه=تمشي بمشى الريح بيدين بحار
يدفها العاصف ونار المكينه=لحظة زمن وتغيب عن شوف الأنظار
كذا قدرنا كلنا خابرينه=ماشي علينا كلنا صغار وكبار
ما يعرفه الا قلوبٍ فطينه=الله يعين اللي على الوضع صبار
دنيا تقلب والمواجع لعينه=لكن ما للقلب من دونها خيار
حوض الشقا بعد الهنا واردينه=واللي يده بالمي ماهو كما النار
حل القسا من بعد طيبه ولينه=ما فات صار لباقي العمر تذكار
كلٍ(ن)على ماقيل قانع بدينه=يا بخت منهو سار في ركب الأخيار
يالله طلبتك بالرضا والسكينه=هون علينا وقتنا بعد ما جار