السلام عليكم ورحمة الله وبركاته
هذه الأبيات مجاراة لقصيدة الذيب الواردة على هذا الرابط
http://www.alqwafel.com/vb/showthread.php?t=14568
علها تروق لكم
الله كريم ومن تعلق في حباله ما يخيب=فرج على يونس همومه والندم ما يوم فاد
محد(ن)بياخذ في حياته غير مكتوب النصيب=ربك تكفل بالبشر والله عليم(ن)بالعباد
يا ذيب هون لا تجر الصوت وتجر القنيب=أرزاقنا كثر الدبا وأطماعنا كثر الجراد
كثر صلاتك والدعا كثره والمولى يجيب=ما خاب مؤمن ماسك(ن)درب الهداية والرشاد
هذي حياةٍ فانية والكل للخالق منيب=دنيا تقلب يا فتى ما دامت الدنيا لعاد
دامك على نهج النبي منته على نهج الصليب=لا تشتكي من هم دنيا نورها يرجع سواد
الهم يا ذيب الغداري بالمطالب والطليب=اللي عليه مصككه بيبان يرثع بالقياد
يصبح نهاره ليل ورموشه من البلوى تشيب=طول السنين تمر فوقه لابسة لبس الحداد
جرح(ن)يطيب وجرح ياراع القصائد ما يطيب=أقول مشكانا على اللي رافع السبع الشداد
لكن هذي حالة الدنيا تقلبها عجيب=بالصيف نشكي من سموم وبالشتا نشكي براد
ياذيب حاسب وإحسب الأعمال لليوم الرهيب=هذي نصحية والنصيحة تشترى علم(ن)وكاد
خلك على ماقيل ياسرحان ذيب ولد ذيب=ترى المعاند ما يعقب بالقلوب الا عناد
هذا كلامي واللبيب يعرف مقصود اللبيب=بعد القصائد حولت ميدانها فوق الجياد
وقت المحارب ما يقابل للحريب الا حريب=والطارفة وقت اللقا عند العرب دائم سداد
هذا جوابي والنجابة ما تفارق للنجيب=والمعذرة كل(ن)على ماقيل بالماجود جاد