أسعد الله أوقاتكم بكل خير
كالعادة الأبيات بدون مقدمات
علها تروق للبعض والا رضا الكل غاية لا تدرك
ياللي تلاعبني بمعسول الكلام=هذا سلاح ما يحسم المعركه
الضلع ما يهتز لو رشه غمام=والبحر ما يرتاع من فر سمكه
لو قلت لك ما تفعله حلو وتمام=بعض المواقف موجبه للفبركه
وإن قلت لي سلام برد السلام=رد التحية طيبٍ(ن)فيه بركه
وليا سلكت بدرب محلك بالظلام=ماهو بغصب أمشي بدرب تسلكه
درب النقا واضح ولافوقه عسام=والنور ماهو مثل ظلمه محلكه
ومن لا يحسب للندامة والملام=ماني خويه بالمتاهة بتركه
أنا معي عقلي ولاني غر فام=ماني من اللي يرتمي بالتهلكه
ما رافق الا واحدٍ(ن)عالي مقام=بالمملكه والا بغير المملكه
ليا حان وقت الجد شديت الحزام=واللي يقابلني حرامٍ(ن)بهلكه
في راسي التدبير وبكفي حسام=والكلكة ما تنحسم بالكلكه
الحر ما يندس ما بين الحمام=ولا كل طيرٍ(ن)سهل ياقع بشبكه
الليث لو نابه تبين للأنام=لا تحسبن الليث شيء(ن)ضحكه
قلب الأسد ما ينام لو عينه تنام=يفز لامنه شعر بدنى حركه
مايدس راسه بالثرا غير النعام=اللي يروعه كل صوت ودربكه
هذا قراري بالبداية والختام=ماني من اللي يتبعون الحكحكه