الأبيات بدون مقدمات
طازجة
لا طازج الا الطازج
بأمان الله نودعكم وهذي حالة الأيام=نبا نصبر على الفرقا لو ان البعد يكوينا
توكل وإدمح الزلات والمعذور ما ينلام=نبا نبقا على طيبٍ(ن)ربينا فيه يغنينا
قضينا ساعة من عمر والفرقا بتبقا عام=لكن إذكر ترى ماني ببايع حي شارينا
أنا ماني من اللي يهدم البنيان لامن قام=ولاني من يبيع رخيص لا دنيا ولا دينا
ترى هذي طبيعة راسخة بصدورن ووسام=شهامة ونتوارثها من أولنا لتالينا
تمادينا مع الأمال والأشجان والأحلام =ندور شربة(ن)من حرقة بالجوف تروينا
بعد ما خفت من زلة تجي وتعثر الأقدام=وتكبر سالفتنا والعرب تدري بما فينا
نبي نترك سوالفنا ونكسر ريشة الأقلام=تجمعنا على طيب وغلا والله يهدينا
نبا نرسم على وجه الزمن لوحات بطيب خام=ونكتب فوقها قصة تفرقنا تلاقينا
نبي ننسج بيوت الشعر وأعذبها من الالهام=حروف الشعر لا راقت تزينها معانينا
نبا نكتب قصائدنا وننشرها لشرق وشام =نبيها تفرح الأحباب وتزعل معادينا
نهايتها الا يالله تختم لي بحسن ختام=وتغنينا عن اللي ما يطالع بالنظر فينا
هنا ناقف ونسجد شكر للمولى على الانعام=لعله يغفر الزلة ليا فيها تمادينا
نبي نختم بذكر الله ونقطع سيرة الأوهام=قبل تمضي بنا الأيام والدنيا تودينا