السلام عليكم ورحمة الله وبركاته
الأبيات بدون مقدمات للتواصل
الله من قلب من الغبن محرور=قهيرة يا كبرها من قهيره
في داخله الهم والضيم منثور=والله يعلم بالخفا والسريره
مضى عليه سنين وأيام وشهور=واضع نظامه فوق هذا الوتيره
يرقص بصدري مثل رقصات عصفور=داخل قفص ما عاد يعرف مطيره
خلف القفص يشوف خلان وطيور=ما فكرت من ظلم وقته تجيره
يعيش في ظلمة والأطيار في نور=كنه يقطع بالسيوف الشطيره
بعد جفاه الخل بالضيم معصور=هذي يوردها وهذي صديره
كنه غريق يصارع الموت ببحور=دفن حلومه بالمأسي غريره
يرجف هنا بالصدر رجفات بابور=قابله موجة عاتية مستطيره
لكن هذا القلب مغرور مغرور=لو طالت أيامه تراها قصيره
مسكين يا قلب(ن)غدا شبه ناطور=على هموم(ن)في رحا مستديره
أنا أشهد إن الموت أخير من جور=تحمله ما تدري بتالي مصيره