السلام عليكم ورحمة الله وبركاته
كما عودناكم بالتواصل بأبيات في معظم الأوقات
اليكم ما يلي وعله يرقى لذوقكم
أكبر مصيبة بالزمن غربة الروح=حتى لو إنك عند منهو يودك
ليا صار ما تبغاه ماهو بمسموح=والعاصفة تاقف مع الوقت ضدك
تكون حي وداخلك حس مذبوح=طول العنا والضيم والجور هدك
تضحك قهر والقلب بالجوف مجروح=وليا تمرد هاجسك قسر ردك
هم الليالي دوم في صدرك ينوح=لو جيت تفلت منه بالغصب حدك
دامك غريب إنسى مسرات وفروح=سج العمر والله يخلف بكدك
لو كان دمك داخل عروقك يفوح=إحذر تبين للمخاليق سدك
سوق الفكرلو كان ماشفت مصلوح=على حصان الصمت ما فيه قدك
لا تركب أمواج التذمر على لوح=تغرق وتبقى سيرتك دوم بعدك
خل الأمل قدام الأعيان مطروح=وإعمل بجد ولا تقصر بجهدك
لا تنظر لقاع الجبال ناظر سفوح=سيف الكسل غدار لا لنت جدك
صبرك على غربتك أخير من بوح=تفرح به العذال ويضيم بدك
أكبر مصيبة بالزمن غربة الروح=حتى لو إنك عند منهو يودك