السلام عليكم ورحمة الله وبركاته
كالعادة الأبيات تعبر عن نفسها
علها تروق لكم
يا هاجسي الليل ناوي مقانيص=وأنا أخبرك للقاف والعرف قناص
غوص لبحور الشعر يا هاجسي غيص=ما يغرق السباح بالبحر لو غاص
هات الجواهر والدرر رص ترصيص=وأنا بجهز عدة القنص بالشاص
القاف هاته ذرب ما فيه تخويص=ترى الشعر يشين لا منه إنخاص
ترى الشعر منقود لا جا بتخبيص=والا حلا مثل السري جنبه خلاص
بعض القصائد ضؤ والبعض تبصيص=وبعض القصائد حقها جوف الأقفاص
بعدين خصصها على الكيف تخصيص=إنشر بعضها وأترك الزين للخاص
هات السمان ولا تجيب الفصافيص=واللي يعرف الصيد ما يرمي غفاص
عدل عوجها رصص البيت ترصيص=ترىالعوج بالدرب علة ليا حاص
جنب عن اللي ريحته تشبه النيص=كمل خللها لا يجي قافك نقاص
لا تشتري برخيص وتبيع برخيص=ماني من اللي يقنعه ربع وأنصاص
قاف(ن)ينصص بالمنصات تنصيص=وقاف(ن)كما الثعلب مع الدرب حواص
قاف(ن)يجي مطواع من غير تنغيص=وقاف(ن)عنيد ولا يجي بالسهل عاص
قاف(ن)طويل ويلزمه بعض تقصيص=وقاف(ن)قصير ومدته شربة قلاص
أحد(ن)يجيبه يابس(ن)كنه الشيص=وأحد(ن)يجيبه عذب يشرب بمصاص
بعض المواقف تقرص الفكر تقريص=يجي جوابه يشبه لمضرب رصاص
وبعض المواقف مالها عاد تخليص=ما كنها الا سيف في كف قصاص
هذا كلام ملخصه زين تلخيص=م احتجت في رده معاول ومفراص
أحيان سقته مد وأحيان تقليص=ما أظن يحتاج له ناقد وخراص
هذا بعض ما قلت ما هو بتحصيص=الشعر بحر(ن)ما رحم كل غواص
التميز
الإهداءات
يا هاجسي الليل ناوي مقانيص !!!
رد: يا هاجسي الليل ناوي مقانيص !!!
