جديدنا عله يلاوق لكم
يأم الرموش اللي كما عسكر صفوف=تجرح بنظرتها ويجرح هدبها
منقوشة الكفين والخصر ملفوف=إن مت يأهلي موتتي من سببها
ما كنها إلا رماح فرسان وسيوف=يا شين حظ اللي كمايه قربها
الخد كنه ورد بالتو مقطوف=وأنفاسها كن السمايم لهبها
المبسم اللي كنه التوت بوصوف=لو تلمسه بالكف يمكن خضبها
والأشقر اللي فوق الأمتان مصفوف=روح المهاوي من عروقه نهبها
العنق عنق اللي تذير من الحوف=سبحان منهو للمحاسن وهبها
اللبس عصري قاربٍ(ن)لونه الموف=والعطر باريسي فؤادي جذبها
جتني تسوق الموت وتقول لي حوف=حوفك تشب النار عانك حطبها
قلت:ارحبي يانوف مدري مثل نوف=قالت على هونك مبين غضبها
قلت السموحة وش حصل قالت الخوف=الخوف دمر مترفتك وعصبها
قلت:ابشري بالعز وعيونك تشوف=دامك معي نفسك بتأخذ طلبها
قالت:تمهل لا تسابق بمعروف=النفس ما تقدر تفارق عربها
في داخلي شوقٍ(ن)من الخوف مكتوف=لكن روحي خوف ربي غلبها
جوف الحشا بركان حارق لي الجوف=الروح فوقك بالمودة غصبها
ودي بقربك مير تمنعني ظروف=ياليت حظي بالزمن ما جلبها
قلت:إقربي وإرمي لويلات وحسوف=قالت:لا بالله دم قلبي شربها
ما عاد بقدر مشربٍ(ن)ذقت بعوف=دم الحسايف وصل حتى ركبها
قلت:احلمي بنت المطر برق وشعوف=جتني معك والروح شوقي كربها
أرعد لها الخافق بلا حلم وكسوف=بعث موات أحلامنا من تربها
يا لوف قلبي منك يالمترفة لوف=هذا جزاء روحٍ(ن)غرامك نكبها
هذا غرامٍ(ن)صلف ماهو بمخلوف=دامك حرمتي روح شيءٍ(ن)عجبها
باق العمر بقضيه في حلم وطيوف=تمرني بالليل ما أحد(ن)حجبها
يأم الرموش اللي كما عسكر صفوف=تجرح بنظرتها ويجرح هدبها
التميز
الإهداءات
بنت المطر !!!
رد: بنت المطر !!!
