أسعدكم الله بكل وقت ومكان
كالعادة الأبيات بدون مقدمات
علها تروق لكم
لا تعتذر العذر ماهو بكافي=جرحك بقلبي ما تداويه الأعذار
ما كل عذرٍ(ن)للطواعين شافي=ولا كل جرح يبان لحداد الأنظار
ينزف لو إنه بالنظر ما يشافي=الدم يغلي غلي زيتِ(ن)على نار
أوجاع قلبي ساترتها النحافي=بين الضلوع بقلب كاتم للأسرار
وأقول أنا طيب ولا من خلافي=صابر وربي عون مع كل صبار
من شأن لا يفرح بحالي ضعافي=ناسٍ(ن)تدور للشماته بالأحرار
من حبةٍ(ن)يبنون قبه يا كافي=ومن ماش سووا صار لو كان ما صار
ما يفرحون إلا بطيحة سنافي=يلقا بها ما يبتغي كل ثرثار
يمدح بوجهي والهتايل خلافي=مثل: ليا غاب القطو يلعب الفأر
وإن عودت لمواجهٍ(ن)بالرهافي=ما ينلقي ويروغ روغات مكار
حتى لو إنه بالسوالف خرافي=لكن بوقت الجد من ماقفه غار
مثل الخروف ليا إنعزل عن خرافي=إن كان ما تربطه لو تطلقه نار*
يا مدور الأوجاع دور عوافي=لا تتبع الأنذال دور للأخيار
دور على قدك حمولٍ(ن)خفافي=خل الكبار يشيلها غيرك كبار
لا تعتذر العذر ماهو بكافي=جرحك بقلبي ما تداويه الأعذار
* معناها هرب
التميز
الإهداءات
لا تعتذر العذر ماهو بكافي !!!
رد: لا تعتذر العذر ماهو بكافي !!!
