قليـــل في حقــك هـــلا يا حيــاتي.....لأجلنــك أغلى في عيوني من الـــروح
يا بعــد عمــري يا هنـاي وغنـاتي.....يا من لها قلبــي غـــدا روض وسـفوح
أنت الــــذي عندك هنـاي وشـقاتي.....دواي فيـــك ومنــك حــسيت بجـــروح
أنت الـــذي حليـــت في كل ذاتـــي.....وملكــت مني خافـــي الســر والبـوح
وأنت الـــذي جمعــت فيني شـتاتي.....هـم والــم وأشــواق وســرور وفـروح
من كل شيء وشيء صحو وسباتي.....همس ونغم وصراخ والصـوت مبحوح
حبــك ملكنـي من جميـع الجهـاتي.....وأنت الوحيــد اللي له البـــال مشروح
أذكرك وأنا ساجدٍ(ن)في صــلاتي.....يا من بنى في خافي عــرش وصـروح
ومع كل هذا هجــركم هو جـــزاتي.....منعــت وصـلك والهجــر بس مسـموح
إن كان قصدك من غرامك وفـــاتي.....ما هي بعيـــدة صــرت للهــم مســدوح
ما باقـــي الا تجمعـــين الرفـــاتي.....نوحــي علـــي إن كان يسعدك النـوح
والا أتركيني وإرحلـــي من سكاتي.....ما دام عندك صـــار مافــي مصــلوح
ما قلـــت لك في يــوم ودي وهـاتي.....يا من تحســبن الهـــوى هرج ومزوح
خلينـي أبقـــى بسيــتي وحسنـاتي.....روحـي بمــان اللــه وأنا عنـك بـروح
خلينــي أكتـب للــزمن ذكـــرياتي.....وترى الغـلا مهما جرى عشق ممـدوح
ولا أظـــن مثلي من يسـوي سـواتي.....يرجــي حيـا في ديــرة كلها شـحوح
التميز
الإهداءات
