بالطيب والمعروف يا صاحبي عيش=ومن لا تجمل في لياليه ما عاش
تعاملك خله مع الناس بشويش=تكسب قلوب الناس ماحد ينحاش
خلك خفيف الظل لا تحب تفتيش=تلمع كما يلمع على ضوه فلاش
أحذر قريبك لا تطفشه تطفيش=لا تجابه الزلة بزلة و رشاش
برش طريق الطيب بالطيب تبريش=يرجع قريبك للمودة ولو هاش
نصحية لا تعتفش بس تعفيش=لا تصير للي خافية دوم نخاش
همش على الزلات بالعقل تهميش=واصل رحمك بكل حزة ومغباش
الشين لا تنبشه بالهرج تنبيش=خلك فطن لا تصير للشين نباش
ترى النفوس بطبعها تضيق من ويش=واكثر بلاوينا بذا الوقت من ماش
وليا ظهر في دنيتك بعض تشويش=خلك صبور ولا تسمع للأوباش
لا تستمع في هرج راع المحاريش=اللي حياته كلها حراش بحراش
ترى السحائب اوله زخ ترشيش=وسطه غزير وينتهي عاد برشاش
اقفل دروب بليس يا صاح بالشيش=تبصر طريق الحق ما صابك عماش
جنب عن اللي فيه للخلق تغشيش=أخبث صفات الرجل لا صار غشاش
والعلم لا تنقله للناس تبكيش=من شان لا تعرف مع الناس بكاش
بعد عن اللي مجلسه فيه تحشيش=من جالس الحشاش سموه حشاش
الكهربة ما دامها داخل الفيش=يبقى سليم ويعطي النور لافياش
الماء ليا منه قرب نار بيطيش=وإن كان بعدته عن النار ما طاش
الحر ما يرقا ليا نتف الريش=والذيب ما يرضى مناطحة الاكباش
ترى الذهب والمأس مهو كما الخيش=الفرق واضح بينها مأس وخياش
التميز
الإهداءات
مـأس وخيـاش !!!
رد: مـاس وخيـاش !!!
