خل الهوى لمعكفين الأشانيب !!!

أسعدكم الله

طرحت قصيدة بعنوان ماي وايف

على الرابط التالي

http://www.alqwafel.com/vb/showthread.php?t=21381

فرد عليها الشاعر عبدالرحمن المسعودي ومن ثم رديت على رده واليكم ما صار عله يروق لكم

يقول الشاعر عبد الرحمن وصح لسانه

ياذيب يالي فوق روس المراقيب = تعوي بعالي الصوت في ضلع نايف
سمعتك تنادي ولا عندك مجيب = وتجر صوتك بالعلوم النظايف
وترسل كلام الشوق مالك مناديب = من بحر شعرك تكثر من الغرايف
قلبك خضر تغرف من البحر وتجيب = ولا تجيب من العلوم الخفايف
يابن هليل علمتنا التجاريب = سبعه سنين سمان بعد العجايف
وان الهوى ماله طعم دون تعذيب = هذا كلام الحق ماهو بزايف
ياكثر ناسن في المحبه مصاويب = سهم العيون الناعسه سيف سايف
كم واحدن كثرة عليه المضاريب = لا شان وقته قال هالوقت حايف
وانا مشيت بدرب ماعنه تجنيب = والقلب لافه من هوى البيض لايف
درب المحبه غلب القلب تغليب = افهم كلام العين وهمس الشفايف
وتبي الصراحه يبغى للوضع ترتيب = من قبل لاتعرض علينا الصحايف
صلي صلاتك واعتكف في المحاريب = والي مضى ربي عليه الخلايف
والا جروح الحب لابدها تطيب = لو الزمن سبب هموم وحسايف
ياذيب يالي فوق روس المراقيب = تعوي بعالي الصوت في ضلع نايف

فقلت ردا عليه بما يلي:

يا ذيب ياللي في علو الأشاعيب=تعوي بعد حافك من الجوع حايف
الجوع غرز في حشاك المخاليب=وأرخيت له راسك ولا هو بطايف
واليوم تعوي من حروق المشاهيب=تقنب وحيدٍ(ن)بالطويل المهايف
فضحتنا عند الأهل والأجانيب=تبا الربيع وتنتوي للمصايف
خل الهوى لمعكفين الأشانيب=اللي يخلون الصعايب عسايف
لا صرت ما تقوى لماقف مصاليب=عذر ودور للعلوم الطرايف
سيف الهوى ما ينصي بالمشاعيب=وأهل الأشدة ما تعود ردايف
يا شاعر الهذلان معك تحاسيب=ما بين نار ونار تبغا قطايف
تبا الجمالة والجمل والمحاليب=ودك بذي وذيك والرب رايف
وإن كان بدلت القنا بالمغاريب=ما عاد أنا وإياك ربع وحلايف
بعد الهوى قطع زرار التلابيب=أشوف بعلومك شبيه الخرايف
ارتاح من كثر العنا والهناديب=غط العلوم الماضية باللفايف
صل الفروض وصوم والمال بالجيب=غمض عيونك لا تشوف الرهايف
الموت لو يمهلك ما ماهلك شيب=يكفيك من دنياك ماض الغرايف
يا ذيب ياللي في علو الأشاعيب=تعوي بعد حافك من الجوع حايف

صحت السنكم جميعا


ابداع من الطرفين

صحت السنكم


ابداع من الطرفين

صحت السنكم شعار ما فيكم حيلة


موفقين

صح الساااانك يابن هليل اعجبتني المساجله وحبيت ارد بهذي الابيااات واعذرنا على القصور لان القاااف استهلك كثير في المساااجله ولكم تحياااااتي


ماجيتك اشكي لك ولا لي مطاليب = انت الذي تشكي على البث لايف


انا من صقورن طوال المخاليب = منزالنا مايوصلونه ضعايف


يشهد لنا الاغراب قبل الاصاحيب = والي يعادينا دموعه ذرايف


وماني من الي ينسجون الاكاااذيب = وفي الماقف الغصاب ماني بخايف


وياشاعر العتبان للقول تهذيب = الفرق واضح بين جزل وسخايف


واحسب حسابك لانحش العراقيب = مابيك تحداني لدرب الحسايف


كلن يقدم حجته والمكاتيب = والشرع يحكم بين خالد ونايف


واوضاعكم ياناس فيها الاعاجيب = يالي سكنتوا بين مكه وطايف


الضيف لاجاكم ترى له مواجيب = قدر ضيوف الله وسوق اللطايف


ماجيتك اشكي لك ولا لي مطاليب = انت الذي تشكي على البث لايف

صحت السنتكم جميعا

وبيض الله وجيهكم

وفقكم الله والى الامام

لكم التحيه

صحت السنكم





تقبلا التحية

صحت السنكم لا هنتم



خالص التحية

صحت السنكم ولا هنتم



خالص التحية

صح لسانك وفيت وكفيت لا هنت



خالص الاحترام