مايطيق البحر شاعر ضايقٍ مترامي=والجهات بلا هواده كلها مقضوبه
قال صدره للرياح ان كان ثرتي نامي=دام حزن ارواحنا له ذاكره مثقوبه
مايطيق النسخ والرقعه يحب السامي=وان ترآى للكثير من الكثير ذنوبه
فلسفيٍ لا حكى المبهم يجي متعامي=عيبه انه واضحٍ جداً وذا عذروبه
يستلذ انه يجي متناميٍ …متنامي=ويتفرع ويتفرع مثل حزن دروبه
كان دوره في الحياه مرتبٍ ودرامي=ورغم هذا كان يتساقط غناه إعذوبه
كان يسقى زعفران الوجد لو هو ظامي =ويسحب الفجر بطرف كمه ويدخل ثوبه
كان متوحد مثل حزن الغريب الشامي =صاحبٍ لي خلته كل الجهات إلعوبه
صاحبٍ ضاقت به الدنيا وفل اقلامي=قال لي شرّق مادام احزاننا مرغوبه
قال خذني وين ماترغب وقلت : احلامي=قال يعني؟ قلت يعني ايامنا المسلوبه
حيث مايحمل رماد الليل صبحٍ دامي=والنهار اسبغ على التوديع بعض غروبه
حيث يتشكل وطن لشفاهنا قدامي= ونتمضمض به رجا لقلوبنا المنكوبه
اذكرك ياصاح من علقّت بأستفهامي=روحك الجذلى وأنا اردد حديث التوبه
كنت أهيجن وانكسرلكن يقول إلهامي =غن دام جرارهم في فيضتك مسكوبه
غن يمكن يسبل المرمي جفون الرامي =ويطلق المسجون سجانٍ منعه هروبه
غن يمكن يزهر الأنجيل شيء اسلامي =غن دام حظوظنا بالعالم ال ( مضروبه)
ايه اكره هالبحر لكن يشيل أنغامي= دام مابه من حمل صوتي عشان أذوبه
ما أطيق البحر لكن وحده اللي زامي =ولأجل هذا اركن بشطآنه المذبوبه ..
لـ الشاعر بدر صفوق
التميز
الإهداءات
ما يطيق البحر
