نت ومسنجر !!!

يا حبيبي اسألك باللي خلقنا كان تذكر=كم ليلة كنت انا وإياك للصبح انتسامر
وكم ليلة اشتكينا من بطي نت ومسنجر=وكم ليلة قلت لك اسف حبيبي وانت خابر
ما نسيتك كل ليلة كنت بالميعاد تحضر=كان ما تذكر تراني يا حبيب الروح فـاكر
كنت تشرح لي بدايات التحول والتطور=ما دريت ان الزمن بيدور والدنيا دواير
هالليالي كل ماهو نطلبه جاهز ميسر=مير وين القاك عني مختفي يا عين جابر
وان لقيتك بالمصادف قمت يا عمري تعذر=مالي الا بعذرك مجبر واقل لك انت تامر
الله اكبر ما هقيتك يابعد عمري تغير=الله انه لا يسوك سو بي واكون شاكر
العهد بيني وبينك حافظه مظهر ومخبر=لو تأمرني أطيح بنار لأجلك قلت حاضر
الغرام اللي زرعته بالحشا ما كان مظهر=ذي حقيقة عشق صادق محتوي كل المشاعر
الهوى مكتوب من رب البشر فوقي مقدر=حل حبك في عروق القلب وأذكى قلب شاعر
الوفا فيني طبيعة وأنت يا محبوب تخبر=والله إني ما تغير لين تحضني مقابر
وأدري إنك يا حبيبي بالوفا للحب تقدر=يا بعد روحي وقلبي والمشاعر والنواظر
المكان اللي سكنته بالحشا جاهز معمر=ما تغيره الليالي والظروف ومكر ماكر
الهوى بالخافق اللي تسكنه يعلا ويكبر=راسخٍ(ن)مثل الجبال الشامخة والرب ساتر
وردك اللي زارعه خلف الحنايا قام وأثمر=شوف منتوجه على وجه القصائد بالدفاتر
أنت قصة عشقي المجنون يالورد المعطر=قصتك تبقى بشعري كابرٍ(ن)من بعد كابر
بالنهاية يا حبيبي أحمد الرحمن وأشكر=أشكر الله يوم قلبي من غرامك دوم عامر
الله أكبر صدتك وإلا إنشغالك طعن خنجر=تطعن الحلم الجميل اللي رسمته بالمحاجر
والله أكبر فوق حسادي وحسادك نكبر=والله أكبر نستعين بربنا من شوق كافر
الله أكبر فوق من يوعد حبيبه ثم يغدر=والله أكبر فوق ونة مالها لأول ولأخر
الله أكبر فوق وقت وحظ عاند الله أكبر=يا معين تعين منهو مثلنا عاشق وصابر
يا حبيبي ذا جوابي أذكره عساك تذكر=كم ليلة كنت انا وإياك للصبح نتسامر

صح لسانك مدد ماهو عدد

تقبل التحية

صح لسانك ولا هنت شاعرنا الراقي

ممتاز صح لساااااااااااانك

تقبل اعجابي

صح لسانك ولا هنت مبدع متجدد

احترامي

صح لسانك ابدعت شاعرنا


تقبل التحايااااا

صح لسانك وبيض الله وجهك


تقبل التحية

صح لسانك واحساسك استاذ الشعر

صح لسانك شاعرنا روووووووووعة

صح لسانك واعتلا شانك

تقبل التحية