أحس قلبي يوم مر الهوى فز=اختلت الدقات من هول مابه
ظلى يفوح الدم كنه على قز=واختل تنظيم العرق وانصبابه
كله من الّلي يوم مر يتقمز=قمز الغزال الّلي خفيف صوابه
وز الغرام بداخلي يا عرب وز=شي(ن)نسيه القلب عود وجابه
علق معاليق الهوى قام يجتز=حتى عزيز القلب عيا يهابه
فرحان بالثوب الجديد المطرز=يناظره في جيته في ذهابه
كل ماتسارع بالخطا قام يهتز=امقيد الوركين ضيقة ثيابه
ما حط فوق الوجه برقع مقربز=الراس ما لفه بكامل حجابه
زمة نهوده مغريات(ن)مرزز=الذوب فوق الريق بالريق ذابه
تحسب خدوده دمها فوقها نز=ومن الصفا عنقه يبين شرابه
صفة رموشه من حراب مركز=رمشه رفيق الموت عجل انتدابه
اصابعه مثل الأخله تغزز=اخشى عليها تنجرح من عضابه
ريان عوده ماتراخى من اللز=ما ذاق حر الشوق بعد التهابه
ربى على التدليل غرو(ن)معزز=توه صغير السن بأول شبابه
ذبحتني بالضحك والغنج والغز=ما ني بعارف رقته من عتابه
اتعبتني بالصد والهجر والدز=أطرد ورا حلم(ن)بعيد سرابه
إن كان قصدك من صدودك تعزز=هلا بصدك مرحبا يا هلا به
وإن كان قصدك من دلالك بتبتز=جيتك بحالي لو فيها عذابه
القلب عندك يااريش العين غرز=ماعاد يعرف مخطيه من صوابه
انا كتبت اسمك بظرف محرز=وأودعته الخفاق وأحكمت بابه
التميز
الإهداءات
برقــع مقربــز...؟؟؟
