خذ عهدتي ويا الرتب والنيـاشين .... ثم قل لهــم يا بوسعــد يتركـوني
قدني خدمة الجيش فوق الثـلاثين .... بس ليتهــم يا بوسعــد قـدروني
لكـن تكفى طالبــك قوم ذا الحيـن .... كمل جميلك لجل ادبر شـؤوني
وسلم على من كان له قدربالعين .... وقل لـه فمــان الله لايحتروني
واشكر لي القايدعلى فعله الزين .... وقل له انا اللي قلت لك قاعدوني
والحمـــد لله ما بدر مني الشــين .... ذي رغبتي قبل العـرب يظلموني
عندي كرامة واحـد ٍ ما يبي شِين ....غير انهـم بالخيـر بس يذكـروني
ودام العمر توه ولا صك خمسين .... رح قل لهم في ذمتي ماعرفوني
وخلني ابأخذ لي من البن فصلين .... واقنص مع اللي بالقنص ولعوني
ويا زين خوة راكبيـن النيـاسيـن .... في قاع قفـــر ٍ والـربع يطردوني
وعندي على الشبه مع الحرشاهين .... عليه ربعي فالطـرد يغبطــوني
النــادر اللـي مجـرم ٍ بالكـراوين .... واليا طرد خرب ٍ يكحل عيــوني
وسلم لي يامحمدعلى ناعي البين .... وقل له بعد ظلم الخوي وش يبوني
ومن غير يامحمد تلمح وتفطين .... رح قل لهم يا بوسعــــد يتركوني
التميز
الإهداءات
خذ عهدتي ويا الرتب والنياشين
