طابت أوقاتكم بالمسرات واليكم الأبيات
البارحة ما نمت والبال مشغول=ما بين شيءٍ(ن)راح وأشياء جديدة
كني عن العالم بذا الليل مفصول=سهم المواجع في خفوقي سديدة
أجر لحن الشعر وأقول لا حول=سنين والأرواح ماهي سعيدة
معقول هذا شيء ما هو بمعقول=أحلامنا ضاعت بنكسة شديدة
وأرجع أطيب خاطر الجرح وأقول=بكرة تلين أحوال كانت عنيدة
وإن كان ما لانت ليا داير الحول=ابكي عليه يا لحون القصيدة
ما عاد ينفع بالدوا هرج مرسول=لا صارت الموته عليًه أكيدة
ولا عاد ينفع بالعنا حيل وحلول=خارت قوى صبري وحكمة مفيدة
حل الشقا فالقلب بالعرض والطول=حظي و وقتي ناصبة لي مكيدة
غديت كني فالعرب شبه مخبول=ما كني اللي كنت حي الوليدة
الجسم ينحل والفكر شبه مشلول=ما عدت صيًاد الحلول الشريدة
عقلى غدى للهم داهل ومدهول=وأيضا غدى قلبي للأوهام صيدة
أعرف بلا حالي ولا هو بمجهول=لكن علاجه في يدين المجيدة
ذات الثمان البيض والهرج معسول=غزت فؤادي بالوصوف الفريدة
لكن حداني دونها حظ وعذول=غير الظروف الجايرات النكيدة
تقطع حبال الوصل والحظ مفتول=قعد لي بدربي ياشين القعيدة
وأنا أشهد إن الحظ في صفقته غول=يغتال حلم العمر طعنة جويدة
ما صابت إلا القلب والقلب معلول=وأحلامه اللي يرتجيها بعيدة
فتل حبال الود بأقوال وفعول=لكن حظوظه في زمانه بليدة
البارحة واليوم بالقهر مشمول=طراد صعبات المعاني طريدة
البارحة ما نمت والبال مشغول=ما بين شيءٍ(ن)راح وأشياء جديدة
التميز
الإهداءات
ابكي عليه يا لحون القصيدة !!!
رد: ابكي عليه يا لحون القصيدة !!!
