أسعدكم الله
اهديكم هذه الأبيات علها تروق لكم
الليل يا ثقله بدونك حبيبي=تكفى تجمل سامر الروح لا تروح
خلك معي من شوف عيني قريبي=واسمع وسولف لي عن السر والبوح
سولف معي يمكن جروحي تطيبي=لا تزيد قلبي جرح والقلب مجروح
لا تعتذر وتقول لحظات أغيبي=منت بعلى هذا التصرف بمسموح
ترى غيابك لو دقايق صعيبي=غيبتك عني تشعل الشوق والنوح
وإن رحت عني يا حياتي غصيبي=عز الله إن الليل بقضيه مشفوح
أشتاق لك شوق اليتيم الغريبي=قدام عينه شايف أبوه مذبوح
ما حيلته غير البكاء والنحيبي=ما يدري إن النوح مافيه مصلوح
بشق من قهري وحري لجيبي=لا صار دم الشوق بعروقي ايفوح
ما عاد ينفع بالمواجع طبيبي=ما دام ليلي من مباهجه ممسوح
خل الهوى يدري بجوره غريبي=راع الهوى لو خادع الروح مفضوح
ونات صدره مثل ون الصويبي=اللي من الطعنات بالفرش مسدوح
ما كنه إلا ناهشه ناب ذيبي=يعوي عوى سرحان في فج صحصوح
كل ما طواه الجوع لج القنيبي=صدره من اللوعات ماهو بمشروح
مثلي ليا ناديت لك ما تجيبي=صدري يضيق وهاجسي يتعب الروح
كن الفراش يصير جمر ولهيبي=الفكر طول الليل شاطح ومشطوح
أون ما بين الفجر والمغيبي=أستورد الأحزان وأصدر فروح
هذا قدر محتوم هذا نصيبي=كتبه رب الخلق للروح باللوح
الليل يا ثقله بدونك حبيبي=تكفى تجمل سامر الروح لا تروح
التميز
الإهداءات
الليل يا ثقله بدونك حبيبي !!!
رد: الليل يا ثقله بدونك حبيبي !!!
