ضيدان بن قضعان
يا مرحبا ترحيبة الغالين في بيت الكريم==بيت جلوي وابن جلوي راع الجميل الاولي
مستور بن تركي صحيبٍ لي من الوقت القديم==لكن أشوفه تالي الايام يتكبّر علي
مستور العصيمي
دام البقى في حفلة الغالين يا الضيف الحشيم==ألدلك بالعين مثل الناس وأنت اتلد لي
إن كان صادق قول يا ضيدان بالله العظيم==أما نحرنا لك جمل ولا ذبحنا لك طلي
ضيدان بن قضعان
لديت لك بعيوني الثنتين وافهم يا فهيم==واحفظ حقوق المالكي والشافعي والحنبلي
صادق ولكن لا تكبّر في العليا والنسيم==لو كانت أمك فاطمه وابيك ابن طالب علي
مستور العصيمي
اعيونك الثنتين لد ابها على اخوك اليتم==أنا عتيبي وش يقرب منزلك من منزلي
المسلم الصادق يبا يبشر بجنات النعيم==والمسلم الكذّاب يبشر له بنارٍ تصطلي
ضيدان بن قضعان
يا صحابنا العتبان حنا كلبونا سيم سيم==لكن حدوها على هداج والمخرج ملي
آعوذ بالرحمن سبحانه من ابليس الرجيم==رفعتها لك غير ما تعرف تشوت إلا علي
مستور العصيمي
البعد لعيون الرجل والكحل لعيون الحريم==مابيك يا ضيدان تقعد مثل ميّاح الدلي
الطيب اللي كل ما هبت ذعاذيع النسيم==يارد على عدٍ من الجمه يغيض ويمتلي
ضيدان بن قضعان
لا صار برطم ماش برطم كيف تنفخ يا شريم==أجرك على قد عملك واجري على قد عملي
الطيب اللي كل ما كنه لمح في الجو غيم==يشعب ركابه لين حتى الغيم عنه ينجلي
مستور العصيمي
قلت لك يا ضيدان غيرها لكن أثرك غشيم==أزيت لا عدل شدادك ياالبعير الساحلي
يالله تغفر له ذنوبه يا سميع ويا عليم==من يصنع الصاروخ ما هو مثل صنّاع الحلي
ضيدان بن قضعان
العود مثلك لا طعنته ما طعنته في الصميم==أحن وارحم والله الوالي ولا غيره ولي
أنا أعرف اليمه ويممها صراطٍ مستقيم==وانته عصيمي لا رسول ولا نبيٍّ مرسلي
مستور العصيمي
اتقولها واقولها مال الغريم إلا الغريم==والمسلمين اخوان بين مكبرٍ ومهللي
وقفت لي يا راعي المعروب في الحزم الصريم==لكن لا بد السحابه لو تغيّم تنجلي
التميز
الإهداءات
محاوره بين ضيدان بن قضعان و مستور العصيمي
