طابت أوقاتكم بكل خير
يا بعيد الدار في قلبي قريب=كل يوم ادق وارسل لك رسايل
ماترد بحرف وبصوتك تجيب=الهجر سوى بمعشوقك غلايل
بذمتك هذا يسويه الحبيب=بالحبيب اللي مداميعه همايل
ودي بشوف وصوتك يارهيب=تمسح لدمعٍ(ن)مثل وبل المخايل
مير يا عزاه صدك صار ذيب=ينهش أحلامي وطرحها قتايل
من بدايات العمر حتى المشيب=الأماني روحت والعمر زايل
صار همي قبل ما يحل المغيب=أسمع أخبارك وحالك كيف قايل؟
ياعساك بخير وجروحي تطيب=يحفظك رب الملا من كل عايل
دام مالي يمكم حظ ونصيب=ماني مدور بذا الدنيا بدايل
ماني براجي قريب ولا غريب=حظي وعارفه ما يبغا دلايل
كل يوم يمر من عمري يعيب=مدري ليش الحظ مع شراوك مايل
لو يعالج كان دورت الطبيب=مير مابه طب يشفي للعلايل
بالبداية والنهاية يا عجيب=يا زمانٍ(ن)ذوق النفس الهوايل
أخذ مني زهرة العمر المهيب=الزمن سوى بمعلوقي عمايل
التصبر صعب ودوايه صعيب=ما يداوي علتي حل وتحايل
علتي ودواي عندك يا صحيب=منك يكفيني ولو قل القلايل
يا بعيد الدار في قلبي قريب=أتمنى بس ترسل لي رسايل
التميز
الإهداءات
كل يوم أدق وأرسل لك رسائل !!!
رد: كل يوم أدق وأرسل لك رسائل !!!
